Como é coñecido pola información dada ata agora polos medios de comunicación, os sindicatos de traballadores asalariados CC.OO. e UGT teñen convocada a nivel estatal unha folga de condutores profesionais de todas as especialidades de transporte (mercadorías, viaxeiros, ambulancias, taxis, etc.) para os días 28 de outubro, 11, 28 e 29 de novembro, e 5 e 9 de decembro. Ademais, en caso de non chegar a acordo, a partir do 23 de decembro convertiríase en indefinida.

A reivindicación fundamental das organizacións convocantes da folga UGT e CC.OO. é a consecución dunha regulación que permita o adianto da idade de xubilación das persoas condutoras profesionais, a través duns coeficientes redutores da idade de xubilación por razón da naturezas da actividade que desenvolven. En concreto, segundo os convocantes, a actividade que realizan condutores, condutores-mecánicos e condutores-repartidores de vehículos lixeiros son “de natureza excepcionalmente penosa, tóxica, perigosa, insalubre e de elevados índices de morbilidade e mortalidade”.

Segundo información hoxe da asociación Vieiros Unidade Galega de Transportistas, onte luns 21 de outubro as principais federacións de transportistas integrantes do Comité Nacional de Transporte por Carretera (CNTC), Fenadismer, Cetm e Astic, mantiveron unha reunión no Servizo de Mediación e Arbitraxe do Ministerio de Traballo cos sindicatos UGT e CCOO convocantes da folga, durante a cal as organizacións patronais se comprometeron a recoñecer a xubilación anticipada e manifestaron a súa disposición a asinar un acordo cos sindicatos para constituír unha comisión tripartita co Ministerio de Traballo para poder realizar un estudo sobre o impacto económico que tal medida suporía nas empresas de transporte, así como outras cuestións de aplicación (data de entrada en vigor efectiva, traballadores afectados, impacto nas cotizacións sociais e outros).

Sen embargo, os sindicatos rexeitaron tal proposta, esixindo a a sinatura conxunta da solicitude formal de establecemento da xubilación anticipada, demanda que foi rexeitada pola parte patronal sen coñecer previamente o impacto da medida. Ante a falta de acordo, volverase a celebrar unha xuntanza entre as partes mañá mércores o pasado xoves, pero  non é previsible chegar a acordo.

En todo caso, de manterse a folga para o 28 de outubro, non se estima que esta teña unha grande impacto no transporte de mercadorías e limitarase a situacións moi puntuais, dada a escasa presenza sindical no sector do transporte de mercadorías. Ademais, no caso de Galicia, esta mobilización adoece de apoios expresos máis aló das organizacións convocantes. Inclusive o sindicato galego CIG xa se desmarcou caracterizando esta folga como “pantomima”.